Tungod May Kinabuhi

(Akong sulayan ang pagsulat ug obra nga Siyento porsyentong Bisaya lamang..)

Nakahuna-huna ko sa pag-mugna ani nga sugilanon kay nakahinumdum lang ko niadtong kabataan nako sa usa sa akong mga ganahang buhaton, kung wala’y sugo si Mama: ang maminaw ug drama sa radyo! Ambot ba, lami man gyud kaayo to nga panahon, makahuna-huna ko sa mga inahan nga magbitbit ug radyo nga kahoy sa suba ug i-uban sa pag kuso-kuso sa mga sinina ang ilang kalagot sa mga kontrabida sa drama nga ilang gipaminaw. Kung sagpa-on ang dina-og daog nga bida, mukusog ang kuso-kuso (dayon pamalikas) ug palu-palo sa ilang mga gilabhan. Kung maubaws ang bida sa kontrabida ug musagpa pud, musyagit dayon ang mga labandera ug “Sige!!! Sagpa-a nang animal!!! Usa sa mga makapahibulong nako niadtong bata pa ko, kung nganong grabe kaayo mu-buwa ang ilang mga labhanan kung sila maglaba. Naka-amgo ko nga tingali, tungod kini sa ilang pagpaminaw ug drama. Kada sagpa, upat ka kuso-kuso. Kada hilak ug pagbakho lima ka kuso-kuso. Ma-o na nga pwerteng humuta sa ilang mga nilabhan maski unsa nga sabon ang ilang gamiton.

Duha ka drama sa radyo nga dili gyud nako makalimtan ay ang Tungod May Kinabuhi (ug unya--- huhuhuhuhu, hilak.. pagbakho… tungod may kinabuhi) ug Kini Ang Akong Suliran (ni Doktora Abogada Prinsesa Doña ug uban pa Lourdes Libres Rosaroso). Sa Tungod May Kinabuhi, himu-an ug drama sa radyo ang mga gipadala nga suwat (nga klaro kaayo nga gikan sa mga maid ug mga manghurno ug pan sa Gal’s Bakery). Ang dili lang ko klaro (pasaylo-a ako kay dili ko kahibalo unsa sa Binisaya ang “sure”) kung ma-o ba ni nga drama ang naay pakapin nga kanta. Ang mga kanta nga i-request sa mga nagpadala ug suwat gihurot na tingali ang tibu-ok album ni Michael Learns to Rock ug April Boy. Sa Kini ang Akong Suliran, si Doktora Abogada Prinsesa Doña Rosaroso, mang hatag ug tambag sa mga magpadala ug suwat. Mao siguro nga siya ang gikuha para maghatag ug mga tambag kay Doktor man siya ug Abogada (maayo nalang kay wala’y mangutana ug mga Math, kay siguro malisang jud si Doktora Abogada daw mu-ingon “Peste dili ko Math Teacher ha”!). Ug ang usa ka kinaiya ni Doktora Abogada nga ganahan jud kaayo ko ka yang iyang pagka “Fair” (pasaylo-a gihapon k okay dili ko kahibalo unsa sa Bisaya ang Fair). Naa’y usa ka higayon, ang nagpadala sa suwat kay usa ka Playboy (sure ko nga kargador ni sa pier ug ang iyang mga chicks kay kanang mga maninda ug kape sa pier gihapon). Ang iyang problema kay minyo na daw siya pero nakapamabdos siya ug laing babaye. Ang tambag ni Doktora Abogada Prinsesa Doña Lourdes Libres Rosaroso, mao ni:

Ikaw lakiha ka, butakal kang dako! Ka baga gud nimo ug nawong nga magpakahigal pa man ka sa laing babaye nga minyo naman ka! Kanang mga sama nimo maayong putlan oy! Ug ikaw sad bayhana ka nga napamabdusan, kahibalo man ka nga naa na nay asawa unya mupatol pa gyud ka? Bigaon gyud kang dako! Mirisi oy nga namabdos ka! Unya unsa-on man na nimo ron? ….. Kini si Doktora Aboga Lourdes Libres Rosaroso ug Kini ang Akong Suliran…